" كل سنــة و أنت طيب "

Submitted by midomind on اثن, 2008-03-10 01:53

اعتقد إننا لو عملنا استفتاء عالمي لاكثر دولة بتقول جملة "كل سنة و أنت طيب" كنا خدنا مركز أول وتانى وثالث كمان , مش لكثرة أفراحنا –لا سمح الله –و لكن للإسراف المذهل في كمية المواقف اللي ممكن تتقال فيها الجملة دى .
"كل سنة و أنت طيب" جملة بتتقال بعد مرور سنة على حدث هام أو عند ذكرى سنوية محببة و هي ما تسمى بالأعياد ولكن لطبيعة الشعب المصري المعروف بأنة شعب ثائر و مختلف عن جميع شعوب العالم كان لازم مايفوتش الجملة من غير ما يخليها ذكر شبه يومي على اللسان .
في الحقيقة أنا فكرت كتير في المناسبات المصرية اللي بتتقال فيها جملة "كل سنة و أنت طيب" , وللحق فإني أقول إن معظم هذه المناسبات صحيحة , لكن زي ما بيقولوا" إن كتر الصح بيوقع في الغلط" واذا لم اكن ابلغ فانا ساحاول ان القى الضوء على بعض من هذه المواقف:-

*الأعياد الشخصية كأعياد الميلاد والجواز وعيد ا لام و عيدين الحب و قريبا عيد الأسرة.

*الأعياد الوطنية –وما أكثرها- مثل عيد أكتوبر و الجلاء و التأميم و الثورة وووو........الخ , ده غير خفة الدم اللي بتظهر يـوم 5 يونيو ؟؟؟

*الأعياد الدينية الإسلامية منها والمسيحية و يا سلام على العيدين الكبير والصغير بيبقى موسم.

*الأعياد الفرعونية زي شم النسيم و وفاء النيل و ده طبعا لأصالة الشعب المصري.

*ولان الشعب المصري بيحب التعليم جدا كان لازم مناسبات تعليمية يعنى عد بداية الامتحانات " كل سنة و أنت طيب" وعند دخول الدراسة و عند إجازة نصف السنة و كل ده كوم و اللي جاية دى كوم تانى.

*الأعياد الفلكية ) طبعا هتقولوا عليا اتتجننت) لكن فعلا في عندنا مناسبات فلكية زي خسوف القمر وكسوف الشمس ده غير راس السنة طبعا والغريب إن بعض هذه المناسبات ممكن تيجى كل أربع سنين أو حتى كل 200 سنة لكن برضة جملة "كل سنة و أنت طيب" هي اللي لازم نعمل بيها الواجب

و لحد كده ماشى لكن انك تلاقى الكلمة دى بتستخدم في حاجات تانيه غير التهنئة ده كده يبقى كتير , يعنى تلاقى الواحد من دول يسال صاحبه "خلصت الشغل بتاعك " يروح صاحبة يرد عليك باستهزاء و يقوله "يا عم كل سنة و أنت طيب" هو فيه حد بيخلص الشغل النهاردة "

أكيد الكلام ده بيحصل قدامنا كل يوم بس ساعات مابنبقاش واخدين بالنا لكن لازم ننتبه قبل ما الحكاية تسوء و تبقى ما فيش على لسانا غير الكلمة دى.

وكل سنة و أنتوا طيبين بمناسبة ..... .