..
Submitted by midomind on ثلث, 2008-06-03 01:25ثاني أجزاء سلسلة صحي النوم
صباحو قشطة
صباحو قشطة بالزبدة يا كبير . من زمااان واحنا عباقرة في كل حاجة بنـفـتي في أي شيء . اما الناس بره مصر كل واحد في حالة بيعمل شغلة وبس , وده اللي عمل الفرق بينـّا وبينهـم .- بيقولك إن البريطانيين عملوا كاميرا جدييدة تكشف الأسلحة والمتفجرات اللي تحت الملابس . هو أختراع قديم انا عارف بس الفكرة البريطانية جديدة . الكاميرا تري من على بعد 25 متر والفكرة أنها تعمل على اساس ان كل الأجسام تصدر موجات مغناطيسية بمستوى قليل . والكاميرا تكشف هذه الموجات.
- بيقولك بقى إن في مصر أساتذة الجامعة (طبعا ً ليهم كل الاحترام و التقدير) مش لاقيين ياكلوا ( لا مؤاخذة) لدرجة الأضراب عن العمل . مصر اللي كانت طول عمرها منارة العالم و أم الدنيا والكلام اللذيذ ده كله يبقى أساتذتها مش لاقببن اللقمة .( ده طبعا ً الدكاترة بس إنما المعيدين ما شاء الله خاربينها كورسات ,اللهم لا حسد انا بحقد بس )- بيقولك بقى إن الناس في أمريكا خايفين من الحرب الالكترونية اللي ممكن الصين تقوم بيها . فخطر قيام حرب الكترونية على أمريكا يزيد كل يوم . ويقول الصينيون أن الحرب الالكترونية ستكون من اهم المعارك في اي حرب ستدخلها الصين مستقبلاً . المقصود بالحرب الالكترونية عمليات القرصنة و صنع الفيروسات والحوارات ده .
- بيقولك بقى عندنا في مصر لو دخلت أي سيبر هتلاقي العيا عمالين يلعبوا الالعاب بتاعت المعاقين زهنيا ً و هتلاقي شوية تانيين اللي بيشيت واللي قاعد على وش الكتاب (facebook) وشوية بيتفرجوا على أفلام ( صباح الجمال) .
- بيقولك ان الحكومة في أمريكا زعلانة عشان مش قادرين ينزلوا إنسان على سطح المريخ (حاجة تــإج) , مع العلم انهم باعتين أكتر من انسان آلي بيبعتلهم صور لسطح المريخ . الكلام ده غير اللي بعملوه الاوروبيون في الفضاء , اخر حاجة عملوها أن مركبة من بتوعهم التحمت بمحطة الفضاء الدولية عشان يبقى ليهم معمل أبحاث فضائي خاص بيهم. (إحنا اخرنا تلاقي العيال بتوع الحتت الشعبية بيطيروا طيارات ورق).
- بيقولك بقى عندنا هنا أن المواضيع اللي منتشرة هي ان البنات لازم يلبسوا نقاب وبلاش بناطيل و كمان الولاد لازم يرفعوا البناطيل عن الكعب شوية . لأ وأجمد حاجة سؤال من واحدة للمفـتي " هو ينفع أصلي وأنا لابسة الحـلق ؟!!!" . و ناس تانية شاغلة بالها بالفرق بين السنة و الشيعة لأ وبرضه في سؤال مهم جدا ً بيتكرر كتير " ندخل الحمام بأنهي رجل؟ ونقوا إيه وانا داخلين؟" . ( مش عارف أقول غير" أرفــض حـــدوث هـــــذااااا " ).مش عارف لحد إمتى هنفضل كده
واحنا شايفيين العالم كله بيتقد ماعدا العالم العربي طبعا نايم في التخلف
متهيئلي اننا مش هنصحى غير لما نشوف القرود عملوا سفينة فضاء
وساعتها هيكونوا الحمير بيصنعوا كمبيوترات والبقر بيطلبوا البرسيم دليفري
وبرضه ساعتها هنكون لسة بنتكلم في لبس المرأة ودخول الحمام ومرتبات الدكاترة
" مصر هي أمي "
- 67 reads
علِّق