MidoMind

تخيل واحد اشترى ثلاجة جديدة وحط فيها قزازة مية بعد كام ساعة جه يشرب لقى القزازة دافية قال اسيبها كمان شوية يمكن تسقع لكن برضه ماسقعتش وبعدين خلص اليوم و القزازة لسة ماسقعتش فاستغرب وقال يمكن العيب من القزازة و راح جايب قزازة تانية حطها فى الثلاجة و برضه ماسقعتش راح جايب قزازة و ملاها عصير قال يمكن العيب من المية لكن برضة قزازة العصير ماسقعتش فضل يروح يمين و شمال وفى الاخر قرر الاعتماد على الطبيعة فرجع لاصله واشترى قلة وحط المية فيها وعاش حياته.....
فى ناس ممكن تعتبر الراجل ده ذكى لانه وجد حل للمشكلة لكن كتير قوى بيعتبروه غبى لانه من الاساس محطش فيشة الثلاجة.
ماتضحكش لان الراجل ده بيعمل اللى احنا بنعملة كل يوم , اى حد فينا بيقع فى مشكلة بيدور على اى سبب يدبس فيه المشكلة و يقول ان كل حاجة فى الدنيا غلط الا هو , و ان كل الناس غلطانة وكل الظروف ضده او بالاصح بيدور على العيب اللى هو عاوز يشوفه و ما بيبصش ابدا على العيب الاهم اللى هو نفسه.
يعنى مثلا تلاقى واحد فشل فى مادة يروح يحضر عند معيد او دكتور تانى ولما ما يركزش وما يذاكرش يقول انا لازم اخد كورس و برضة ما يذاكرش اللى خده فى الكورس ويقول لا المعيد وحش ادور على معيد تانى ولما يسقط يقول ان الدكتور ظلمنى - على اساس ان الدكتور يبقى جوز امه – ولما يعمل التماس و يترفض يقول ان بتوع الكنترول بياخدوا الفلوس وما بيعملوش حاجة ونسى يدور على السبب الرئيسى ان هو فاشل ومبيذاكرش
يبقى نبص لنفسنا احسن ولا نروح نشترى لنا قلة تسقعلنا المية.